8. desember 2021. Sigrún Helgadóttir: Mynd af manni, ævisaga Sigurðar Þórarinssonar, jarðfræðings

Sigrún Helgadóttir, líf- og umhverfisfræðingur
Picture: Karl Skírnisson

Sigrún Helgadóttir.

Sigrún Helgadóttir líf- og umhverfisfræðingur flytur erindið „Mynd af manni, ævisaga Sigurðar Þórarinssonar, jarðfræðings“ á Hrafnaþingi miðvikudaginn 8. desember kl. 15:15.

Ævisaga Sigurðar kom nýlega út í tveggja binda verki. Sagt verður frá tilurð hennar og ritun. Af efni ævisögunnar verður tínd til umfjöllun um störf Sigurðar hjá Náttúrugripasafni Íslands en hann, ásamt Finni Guðmundssyni fuglafræðingi, var fyrsti starfsmaður safnsins þegar það varð ríkisstofnun árið 1947. Hjá safninu vann hann í rúmlega 20 ár og tók þátt í að móta starfsemi þess og framtíð.

Einnig verður sagt frá baráttu Sigurðar fyrir náttúruvernd á Íslandi en hann samdi fyrstu almennu náttúruverndarlögin og vann ötullega að friðun ýmissa svæða svo sem þjóðgarðsins í Skaftafelli.

Ritverkið hefur verið tilnefnt til íslensku bókmenntaverðlaunanna og Fjöruverðlaunanna – bók­mennta­verðlauna kvenna (sís og trans) og trans, kynseg­in og in­ter­sex fólks á Íslandi.

Sigurður Þórarinsson jarðfræðingur í Öskju sumarið 1962
Picture: Halldór Ólafsson

Sigurður Þórarinsson jarðfræðingur í Öskju sumarið 1962 þegar hann var þar í rannsóknaferð sem starfsmaður Náttúrugripasafnsins.