Kjarrsveifa (Syrphus ribesii)

Kjarrsveifa - Syrphus ribesii
Picture: Erling Ólafsson
Kjarrsveifa. 11 mm. ©EÓ

Útbreiðsla

Gjörvöll Evrópa; norðanverð Asía austur til Kyrrahafs og suður um miðbik álfunnar, Miðausturlönd, Afganistan, Mongólía, NV-Kína; Kanaríeyjar; N-Ameríka frá Alaska suður um miðbik Bandaríkjanna.

Ísland: Láglendi um land allt, mun víðar á landinu sunnanverðu en norðanverðu, á miðhálendinu fundin á afréttum Rangárvallasýslu, í Þjórsárverum, Hvannalindum og Esjufjöllum.

Lífshættir

Kjörlendi kjarrsveifu er að finna í skógum, kjarrlendi og húsagörðum en hún finnst einnig í öðru gróðurríku og sólríku þurrlendi, einkum í blómstóðum og gróðurhvömmum. Laðast mjög að hvannsveipum í blóma. Flugtími hefst í lok maí og nær fram í miðjan ágúst. Lirfurnar finnast á lúsugum gróðri, t.d. laufum trjáa, og éta blaðlýs.

Almennt

Kjarrveifa er ekki áberandi, ein og ein sýnir sig innan um aðrar mun algengari tegundir sveifflugna. Hún lætur auk þess lítið á sér kræla nema helst á sólríkum góðviðrisdögum. Þá laðast hún að ilmandi litfögrum blómum og lúsugu greni í görðum og trjárækt, sést þar gjarnan á sveimi í sólargeislunum í skjólsælum opnum og rjóðrum.

Kjarrsveifa líkist mjög nánasta ættingjanum blómsveifu (Syrphus torvus) og á lýsingin á henni að mestu við um kjarrveifuna einnig. Kjarrsveifa hefur þó oft stærri gula bletti á afturbolnum sem gjarnan renna saman í samfelld belti yfir bolinn. Kjarrsveifu má aðgreina frá blómsveifu á því að augu þeirrar fyrrnefndu eru nakin en ekki þétthærð stuttum hárum eins og augu blómsveifu.

Kjarrsveifa (Syrphus ribesii) - fundarstaðir samkvæmt eintökum í safni Náttúrufræðistofnunar Íslands
Kjarrsveifa (Syrphus ribesii) - fundarstaðir samkvæmt eintökum í safni Náttúrufræðistofnunar Íslands

Heimildir

Bartsch, H., E. Binkiewicz, A. Rådén & E. Nasibov 2009. Nationalnyckeln till Sveriges flora och fauna. Tvåvingar: Blomflugor: Syrphinae. Diptera: Syrphidae: Syrphinae. ArtDatabanken, SLU, Uppsalir.

Nielsen, P., O. Ringdahl & S.L. Tuxen 1954. Diptera 1 (exclusive of Ceratopogonidae and Chironomidae). Zoology of Iceland III, Part 48a. Munksgaard, Kaupmannahöfn. 189 bls.

Höfundur

Was the content helpful Back to top

Back to top

Thank you!

Please tell us why:

  • Hide
  • |