Steinfluga (Capnia vidua)

Distribution

Staðbundin í fjalllendi Mið-Evrópu austur undir Svartahaf og fjalllendi Bretlands, nyrst í Skandinavíu og V-Rússlandi, auk fundarstaðar í Mið-Finnlandi.

Ísland: Láglendi um land allt, á hálendinu norðan Vatnajökuls. Steinfluga er algeng á Suðurlandi og e.t.v. víðar.

Life styles

Fullorðnar steinflugur finnast á vorin, frá miðjum mars og fram í maí, á ár- og lækjabökkum og grýttum vatnsbökkum þar sem ölduróts gætir. Þær verpa í vatnið, gyðlurnar vaxa þar upp og ná fullum vexti þegar líður að vori. Þá færa þær sig upp á þurrt og púpa sig í felum undir steinum eða öðru lauslegu. Fullorðin dýr skríða síðan úr púpunum, verpa og hverfa í kjölfar þess. Lirfurnar nærast á vatnagóðri.

In General

Tegundinni er skipt í nokkrar undirtegundir. Capnia vidua brachyptera Hynes, 1955 var lýst frá Íslandi. Karldýr undirtegundarinnar eru vænglaus. Undantekningalítið sjást steinflugur einungis snemma á vorin. Sumarið 1979 var þó annað uppi á teningnum. Við Snæfell á Austurlandshálendinu voru steinflugur á ferðinni um mánaðamótin júlí/ágúst. Það sumar var einstaklega kalt og brást sumarkoma gjörsamlega á þeim slóðum. Vorástand ríkti um þær mundir og skömmu síðar féll fyrsti haustsnjórinn. Dæmi eru um að steinflugur hafi klakist í miklum fjölda. Slíkt vitnaðist t.d. á Hellu á Rangárvöllum snemma í maí 1983. Þá þöktu steinflugur veggi húsa sem stóðu næst bökkum Ytri-Rangár.

Distribution map

Author

Erling Ólafsson 14. ágúst 2009.