Útbreiðsla

Afar algeng jurt um allt landið frá láglendi og allhátt upp í fjöll, fer hærra en frænka hennar, vallhæran.

Búsvæði

Móar, valllendi, melar og fjallshlíðar.

Lýsing

Meðalhá hæra (15–30 sm) með allmörg blómhnoð í axkenndri, hangandi blómskipan. Blómgast í júní.

Blað

Stofnblöðin mjó (1,5–2,5 mm), rennulaga, hærð á blaðröndunum, einkum neðst við slíðrið. Stoðblaðið nær sjaldan lengra en upp á miðja blómskipan.

Blóm

Blómin eru nokkur saman í allmörgum, stuttleggjuðum eða legglausum blómhnoðum í axkenndri skipan sem er lotin á stráendanum. Blómhlífarblöðin sex, dökkbrún eða nær svört, oddmjó. Fræflar sex, frævan þrístrend með einum stíl og þríklofnu fræni.

Greining

Líkist engri annarri íslenskri tegund, þekkist auðveldlega á hinni hangandi, niðursveigðu og axleitu blómskipan.

Höfundur