Útbreiðsla

Víðast algeng á láglendi en vantar þó á nokkru svæði á Norðausturlandi og á Hornströndum. Hún fer lítið upp til fjalla, aðeins á örfáum stöðum ofan 500 m, hæst skráð við Laugafell í 720 m við jarðhita. Gleym-mér-ei hefur krókhár á bikarblöðunum og festist því auðveldlega við föt og eins ull á kindum og dreifist líklega nokkuð með þeim (Hörður Kristinsson - floraislands.is).

Búsvæði

Gilbrekkur, hagar og mólendi, einkum þó í nánd við byggð (Hörður Kristinsson 1998).

Lýsing

Meðalhá planta (10–30 sm), hærð, með fagurblá blóm. Blómgast í júní–júlí.

Blað

Blöðin stakstæð, lensulaga en frambreið (5–7 mm), alsett hvítum hárum eins og stöngullinn (Hörður Kristinsson 1998).

Blóm

Blómin eru 4–5 mm í þvermál. Krónufliparnir snubbóttir, heiðbláir en gulir eða hvítleitir innst við blómginið. Óþroskaðir blómknappar rauðleitir og í uppvafinni hálfkvísl áður en þeir springa út, hún réttir síðan úr sér og eftir blómgun virðast leggjaðir bikararnir standa í klasa niður eftir stönglinum. Bikarinn fimmtenntur, klofinn niður fyrir miðju, alsettur hvítum krókhárum. Fræflar fimm, innilokaðir í krónupípunni (Hörður Kristinsson 1998).

Aldin

Aldinleggirnir helmingi lengri en bikarinn. Fjögur gljáandi dökkbrún deilialdin í botni bikaranna (Hörður Kristinsson 1998).

Greining

Gleim-mér-ei þekkist frá engjamunablómi og sandmunablómi á lengri blóm- og aldinleggjum (helmingi lengri en bikarinn).

Höfundur