Útbreiðsla

Algengur um allt land frá láglendi upp í um 800 m hæð (Hörður Kristinsson - floraislands.is).

Almennt

Ljósberi hefur verið nefndur ilmjurt og ununarjurt vegna ilms blómanna. Píknajurt, þúsunddyggðajurt og fjallaljós eru dæmi um önnur nöfn ljósberans (Ágúst H. Bjarnason 1994).

Búsvæði

Þurrir grasbalar, brekkur, móar, flög og melar (Hörður Kristinsson 1998).

Lýsing

Lágvaxin jurt (6–15 sm) með mjó, gagnstæð blöð og bleik blóm í hnappi á stöngulenda. Blómgast í júlí.

Blað

Stöngullinn með gagnstæðum, rauðmenguðum blöðum. Blöðin odddregin, lensulaga, ýmist rauð eða græn (Hörður Kristinsson 1998).

Blóm

Blómin eru mörg saman í þéttum hnapp sem er um 1,5–2 sm í þvermál á stöngulendanum. Blómin fimmdeild, um 1 sm á lengd. Krónublöðin purpurarauð, klofin í tvo flipa í endann. Bikarinn samblaða, klukkulaga, með snubbóttum sepum, rauður eins og stoðblöð blómanna. Fræflar tíu, ein fræva með fimm stílum (Hörður Kristinsson 1998).

Greining

Líkist geldingahnappi en ljósberinn þekkist á blöðóttum stöngli, venjulega dekkri blómum og skerðingu krónublaðanna.

Höfundur