Vöktun Þingvallavatns á Hrafnaþingi

14.02.2012

Haraldur Rafn Ingvason líffræðingur hjá Náttúrufræðistofu Kópavogs flytur erindi sitt um vöktun Þingvallavatns á Hrafnaþingi miðvikudaginn 15. febrúar.

Vatnssýnataki: Búnaður til vatnssýnatöku. Ljósm. Náttúrufræðistofa Kópavogs

Reglubundin vöktun á lífríki og vatnsgæðum Þingvallavatns hófst árið 2007 þegar Umhverfisstofnun, Landsvirkjun, Orkuveita Reykjavíkur og Þjóðgarðurinn á Þingvöllum gerðu með sér samkomulag þar að lútandi. Markmið vöktunarinnar er að kortleggja ástand og breytingar sem kunna að verða á lífríki, efna- og eðlisþáttum vegna hugsanlegra álagsþátta.

Samkvæmt samkomulaginu hefur Náttúrufræðistofa Kópavogs sinnt vöktun á umhverfisþáttum, s.s. vatnshita, sýrustigi (pH) og rafleiðni, sem og lífverum í svifvist með áherslu á svifþörunga og svifkrabbadýr. Náttúrufræðistofan sinnir einnig rannsóknum á murtu í samvinnu við Veiðimálastofnun.

Í erindinu verður fjallað um verkefnið og helstu niðurstöður þess kynntar. Sérstöku ljósi verður beint að svifþörungum, þar sem niðurstöður benda til að aukning hafi orðið í magni þeirra frá því sem var á árabilinu 1970-1980. Þá verður fjallað um árstíðasveiflur í vatnshita, hitalagskiptingu vatnsins og áhrif ytri þátta á hana.

Erindið verður flutt í húsakynnum Náttúrufræðistofnunar að Urriðaholtsstræti 6-8 í Garðabæ, í Krummasölum á 3. hæð kl. 15:15-16:00. Sjá kort.

Hrafnaþing er opið öllum. Verið velkomin!