Fréttir

Náttúrufræðistofnun Íslands óskar samstarfsfólki og landsmönnum öllum gleðilegra jóla og farsældar á nýju ári.

Árleg vetrarfuglatalning Náttúrufræðistofnunar Íslands fer fram helgina 2.-3. janúar næstkomandi. Markmið vetrarfuglatalninga er að kanna hvaða fuglategundir dvelja hér að vetrarlagi, meta hversu algengir fuglarnir eru og á hvaða landssvæði þeir halda sig.

Hrafnaþing Náttúrufræðistofnunar Íslands verður haldið miðvikudaginn, 16. desember. Ewa Maria Przedpelska-Wasowicz plöntulífeðlisfræðingur flytur erindið „Is Iceland a paradise for people with pollen allergies?“.

Umhverfisstofnun hefur lagt fram til kynningar drög að vatnaáætlun fyrir Ísland sem felur í sér stefnumörkun fyrir vatnsvernd. Tillögunni fylgir einnig aðgerðaáætlun og vöktunaráætlun. Opið kynningarferli stendur yfir til 15. júní 2021 þar sem öllum gefst kostur á að senda inn ábendingar og athugasemdir. Náttúrufræðistofnun Íslands, Hafrannsóknastofnun og Veðurstofa Íslands unnu grunn að áætluninni með sérfræðivinnu.

Mat Náttúrufræðistofnunar Íslands á varpstofni dílaskarfa og toppskarfa hér á landi síðustu fimm árin sýnir að báðum tegundum hefur fjölgað. Á það einkum við um toppskarf sem hefur fjölgað um ríflega 63%, líklega vegna betri fæðuskilyrða. Telja má að skarfaveiði undanfarinna ára hafi verið sjálfbær.

Hrafnaþing Náttúrufræðistofnunar Íslands verður haldið miðvikudaginn, 2. desember. Gísli Pálsson prófessor í mannfræði við Háskóla Íslands flytur erindið „Fuglinn sem gat ekki flogið“.

Árið 2019 voru alls merktir 15.775 fuglar af 82 tegundum hér á landi. Mest var merkt af auðnutittlingum. Þetta var 99. ár fuglamerkinga á Íslandi og voru virkir merkingamenn 53 talsins. Þetta er meðal þess sem kemur fram í nýrri skýrslu um fuglamerkingar 2019.

Grágæsir verða taldar hér á landi og á vetrarstöðvum á Bretlandseyjum 21.–22. nóvember 2020. Náttúrufræðistofnun Íslands óskar eftir upplýsingum um gæsir sem vart verður við næstu daga og hvenær menn sáu síðast fugla á gæsaslóðum.

Hrafnaþing Náttúrufræðistofnunar Íslands verður haldið miðvikudaginn, 18. nóvember. Julian Ohl umhverfis- og auðlindafræðingur flytur erindið „An Icelandic Mystery? The Occurrence of Purple Bones in Arctic Foxes“.

Hrafnaþing Náttúrufræðistofnunar Íslands hefst að nýju eftir hlé miðvikudaginn 4. nóvember. Vegna takmarkana í tengslum við Covid-19 verða erindi haustið 2020 flutt í beinni útsendingu á Teams á netinu. Fyrsta erindið með þessu sniði verður flutt af Borgþóri Magnússyni plöntuvistfræðingi og Sigurði H. Magnússyni gróðurvistfræðingi og nefnist það „Rimamýrar á Íslandi: útbreiðsla og einkenni“.

Stofnanir ársins 2020 hafa nú verið valdar í stærstu vinnumarkaðskönnun á Íslandi. Náttúrufræðistofnun Íslands vermir sjötta sætið þegar skoðaðar eru stórar stofnanir.

Heiðagæsir verða taldar hér á landi og á vetrarstöðvum á Bretlandseyjum 17.–18. október 2020. Náttúrufræðistofnun Íslands óskar eftir upplýsingum um allar gæsir sem vart verður við næstu daga.

Tekið hefur verið saman yfirlit yfir frjómælingar í Garðabæ og á Akureyri sumarið 2020. Á Akureyri var fjöldi heildarfrjókorna talsvert undir meðallagi en því var öfugt farið í Garðabæ þar sem mun meira var af frjókornum en í meðalári.

Náttúrufræðistofnun Íslands hefur metið veiðiþol rjúpnastofnsins haustið 2020 og hafa niðurstöðurnar verið kynntar umhverfis- og auðlindaráðherra með bréfi. Ráðlögð rjúpnaveiði í haust er um 25 þúsund fuglar.

Ársskýrsla Náttúrufræðistofnunar Íslands fyrir árið 2019 er komin út á rafrænu formi. Í henni er fjallað um helstu verkefni ársins og rekstrarþætti.

Háskóli Íslands, Stofnun rannsóknasetra Háskóla Íslands og Náttúrufræðistofnun Íslands gerðu nýverið með sér samkomulag um rekstur rannsóknaseturs á sviði jarðfræði og málvísinda á Breiðdalsvík. Markmið samningsins er að efla rannsóknir í jarðfræði, einkum á Austurlandi, og auka hlut verkefna Náttúrufræðistofnunar Íslands sem unnin eru í landshlutanum.

Í ágúst var var mikið af frjókornum í lofti á Akureyri, talsvert meira en í meðalári, en í Garðabæ mældust frjókorn langt undir meðaltali. Grasfrjó geta mælst í september en ólíklega í miklu magni.

Vegna sumarleyfa starfsfólks verður móttaka og símsvörun Náttúrufræðistofnunar Íslands í Garðabæ og á Akureyri lokuð frá og með mánudeginum 27. júlí til og með 10. ágúst.

Rannsóknir líffræðinga í Surtsey undanfarna daga sýna að gróska í eynni er með eindæmum góð þetta sumarið. Aldrei áður hafa fundist jafnmargar æðplöntutegundir og þar af voru tvær nýjar. Einnig eru tvær nýjar smádýrategundir komnar fram.

Í nýafstaðinni vettvangsferð Náttúrufræðistofnunar Íslands kom í ljós að ábúð og tímgun refa á Hornströndum er með besta móti, eða 40%. Flest óðul hafa stækkað og fæðuskilyrði eru góð, svo árið lítur vel út fyrir afkomu refanna.

Frjómælingar hafa staðið yfir á Akureyri og í Garðabæ síðan seinnihluta mars. Á báðum stöðum mældust fá frjókorn í mars og apríl. Á Akureyri var fjöldi frjókorna í maí meiri en í meðalári á meðan hann var undir meðallagi í Garðabæ. Í júní var fjöldi frjókorna á Akureyri nálægt meðallagi en í Garðabæ var hann vel yfir meðallagi. Frjótíma birkis er lokið en frjótími grasa stendur sem hæst.

Surtseyjarfélagið hefur gefið út ritið Surtsey Research 14. Í því eru 14 vísindagreinar eftir 29 höfunda frá sex þjóðlöndum, þar á meðal eru nokkrir starfsmenn Náttúrufræðistofnunar Íslands.

Náttúrufræðistofnun Íslands hefur metið gróðurskemmdir í Norðurárdal í Borgarfirði eftir elda sem loguðu þar fyrir skömmu. Svæðið sem brann var 13,2 ha að flatarmáli, einkum birkiskógur sem óljóst er hve lengi verður að jafna sig.

Rjúpnatalningum á vegum Náttúrufræðistofnunar Íslands vorið 2020 er lokið. Rjúpum fækkaði á Norðurlandi en fjölgaði í öðrum landshlutum.

Náttúrufræðistofnun Íslands auglýsir eftir 15 námsmönnum í sumarstörf til að sinna ýmsum verkefnum við stofnunina. Störfin eru hluti af vinnumarkaðsátaki félagsmálaráðuneytisins og Vinnumálastofnunar og eru opin öllum námsmönnum 18 ára og eldri.

Nýverið fannst í Vaðlaskógi í Eyjafirði blómstrandi gullsnotra, Anemone ranunculoides, sem aldrei áður hefur verið skráð hér á landi. Það var fyrir tilstilli starfsmanns Náttúrufræðistofnunar Íslands á Akureyri, sem tekur þátt í keppninni „Hjólað í vinnuna“, að plantan fannst.

Vegna tilslakana yfirvalda á samkomubanni vegna Covid-19 veirunnar hefur verið ákveðið að opna móttöku Náttúrufræðistofnunar Íslands í Garðabæ og á Akureyri frá og með 4. maí. Opnunartími á báðum stöðum er kl. 10-15.

Náttúrufræðistofnun Íslands hefur gefið út ritið Annotated Checklist of Vascular Plants of Iceland eftir Paweł Wąsowicz og er það númer 57 í ritröðinni Fjölrit Náttúrufræðistofnunar. Ritið inniheldur lista yfir allar æðplöntur sem þekktar eru á Íslandi, samtals 530 tegundir.

Frjómælingar eru hafnar í Garðabæ og á Akureyri og munu þær standa út september. Trjátegundin elri, einnig nefnd ölur, byrjaði að blómgast um síðustu mánaðamót og dreifa frjóum sínum. Fólk með birkiofnæmi getur fundið fyrir ofnæmiseinkennum því frjókorn birkis og elris hafa sömu ofnæmisvaka. Helstu tegundir sem valda ofnæmi á Íslandi eru birki, grös og súrur.

Vegna Covid-19 verður móttaka Náttúrufræðistofnunar Íslands í Urriðaholti og á Akureyri lokuð á meðan samkomubann er í gildi. Svarað er í síma á afgreiðslutíma stofnunarinnar alla virka daga kl. 10–15. Á vef stofnunarinnar er ýmiss fróðleikur um náttúru Íslands sem upplagt er að kynna sér í samkomubanni.

Þrisvar á ári stendur Náttúrufræðistofnun Íslands fyrir vettvangsferðum í friðlandið á Hornströndum til að fylgjast með viðkomu refa og kanna ástand lífríkis. Slík ferð var farin dagana 15.–25. mars s.l. Vetrarlegt var um að litast, rokhvasst og kalt fyrstu tvo sólarhringana og heilmikið brim. Við það fylltist fjaran af nýdauðum steinbítum af öllum stærðum sem voru hinn vænsti fengur fyrir refi og fugla.

Náttúrufræðistofnun Íslands býður upp á greiningu á myglusveppum fyrir almenning og fyrirtæki og fara greiningarnar fram á starfsstöð stofnunarinnar á Akureyri. Stofnunin vill koma því á framfæri að vegna samkomubanns á tímum Covid-19 ganga sveppagreiningar mun hægar fyrir sig en venjulega og viðbúið að biðtími eftir niðurstöðum lengist nokkuð. 

Náttúrufræðistofnun Íslands hefur hlotið jafnlaunavottun sem er staðfesting á því að jafnlaunakerfi stofnunarinnar samræmist kröfum jafnlaunastaðalsins ÍST 85:2012. Jafnlaunastaðallinn er stjórnunarstaðall fyrir jafnlaunakerfi og nýtist öllum fyrirtækjum og stofnunum óháð stærð, starfsemi, hlutverki og kynjahlutfalli. Hann tryggir fagleg vinnubrögð sem fyrirbyggja beina og óbeina mismunun vegna kyns.

Náttúrufræðistofnun Íslands hefur ákveðið að fresta ársfundi stofnunarinnar sem vera átti 1. apríl næstkomandi á Hótel KEA á Akureyri.

Landsmenn bera áfram mikið traust til Náttúrufræðistofnunar Íslands samkvæmt nýrri könnun Gallup. Samkvæmt henni nýtur stofnunin mikils trausts 59% landsmanna.

Náttúrufræðistofnun Íslands hefur tekið ákvörðun um að fresta Hrafnaþingi sem vera átti miðvikudaginn 11. mars um óákveðinn tíma vegna kórónuveirunnar.

Hrafnaþingi sem vera átti miðvikudaginn 26. febrúar hefur verið frestað um óákveðinn tíma. Nánari tímasetning verður auglýst síðar. 

Hrafnaþing Náttúrufræðistofnunar Íslands verður haldið miðvikudaginn, 26. febrúar kl. 15:15–16:00. Agnes Brá Birgisdóttir þjóðgarðsvörður á austursvæði Vatnajökulsþjóðgarðs flytur erindið Vatnajökulsþjóðgarður – Öræfin eystra, tækifæri í rannsóknum?

Hrafnaþing Náttúrufræðistofnunar Íslands verður haldið miðvikudaginn, 12. febrúar kl. 15:15–16:00. Guðrún Óskarsdóttir gróðurvistfræðingur hjá Náttúrustofu Austurlands flytur erindið Vöktun gróðurs á Snæfellsöræfum og Fljótsdalsheiði.

Fyrsta vinnustofa verkefnisins Vöktun náttúruverndarsvæða var haldin á Náttúrufræðistofnun Íslands dagana 4.–5. febrúar 2020. Meginmarkmið verkefnisins er að setja á laggirnar heildstæða vöktunaráætlun á landsvísu til vöktunar náttúruminja á náttúruverndarsvæðum og öðrum svæðum sem eru undir álagi vegna ágangs ferðamanna.  Áhersla verður lögð á að vakta áhrif mannsins á vistgerðir og plöntur, fugla, spendýr og jarðminjar.

Viðkoma refa á Hornströndum var með slakasta móti árið 2019. Óðul voru færri en venjulega, got sjaldgæfari og yrðlingar fáséðari en áður.  Þetta endurspeglar mögulega slæma afkomu bjargfugla ásamt fleiru, eins og kemur fram í nýútkominni skýrslu Náttúrufræðistofnunar Íslands um vöktun refa á Hornströndum árið 2019.

Hrafnaþing Náttúrufræðistofnunar Íslands verður haldið miðvikudaginn, 15. janúarkl. 15:15–16:00. Árni Einarsson vistfræðingur og forstöðumaður Náttúrurannsóknastöðvarinnar við Mývatn flytur erindið Vöktun á hrygningu bleikjunnar í Mývatni.

Náttúrufræðistofnun Íslands hefur í samstarfi við Blindrafélagið sett upp vefþulu á íslenskum og enskum vef stofnunarinnar. Með henni verða vefirnir aðgengilegri fyrir stærri hóp fólks.

Náttúrufræðistofnun Íslands hefur gefið út jarðfræðikort af Austurlandi í mælikvarða 1:100.000. Kortið nær yfir svæði sem afmarkast af norðanverðum Hamarsfirði í suðri, Loðmundarfirði í norðri, Skriðdal í vestri og Gerpi í austri.