Þrívíddarlíkön af gossvæðinu við Fagradalsfjall

12.04.2021
Eldgos við Fagradalsfjall 20. mars 2021
Picture: Nils Gies

Eldgosið við Fagradalsfjall, 20. mars 2021.

Náttúrufræðistofnun Íslands hefur, í samvinnu við Almannavarnir, Landmælingar Íslands og Háskóla Íslands, birt þrívíddarlíkön af gossvæðinu í Geldingadölum. Líkönin má skoða á vef stofnunarinnar.

Hjá Náttúrufræðistofnun Íslands er starfrækt loftljósmyndastofa þar sem unnið er að jarðfræðikortlagningu með myndmælingatækni, þar sem teknar eru ljósmyndir úr lofti og myndirnar notaðar við gerð þrívíddarlíkana. Þessi aðferð hefur nýst vel við kortlagningu á gossvæðinu í Geldingadal á Reykjanesi en með þrívíddarlíkönunum má áætla rúmmál og þykkt hraunsins, hraunrennsli og margt fleira.

Þrívíddarlíkönin eru unnin af myndmælingateymi Náttúrufræðistofnunar Íslands. Myndirnar eru teknar úr flugvél og síðan er unnið með þær og útbúin líkön í hugbúnaðinum Agisoft Metashape. Líkönin eru vistuð hjá Sketchfab. Eitt líkananna sem birt hafa verið er frá því áður en eldgos hófst en önnur líkön sýna stöðu mála 20. mars, 23. mars, 5. apríl og 8. apríl. Fleiri líkön munu bætast í safnið eftir því sem eldgosinu vindur fram.

Með þrívíddarlíkönunum er hægt að fylgjast með framvindu gossins og eru þau fyrst og fremst ætluð til fróðleiks og skemmtunar. Hægt er að hafa samband við stofnunina til að fá nákvæmari gögn.

Þrívíddarlíkön af eldgosinu við Fagradalsfjall